யாழில் இருவேறு சம்பவங்களில் ஆசிரியர்களின் தண்டனைக்கு இரு மாணவர்கள் வைத்தியசாலையில் அனுமதி!

மீசாலைப் பகுதியில் ஆசிரியர் மாணவியைத் தண்டித்ததால், மாணவி மயக்கமடைந்து வைத்தியசாலையில் சேர்க்கப்பட்டுள்ளதாகத் தெரிவிக்கப்படுகின்றது.
யாழ்.மீசாலை விக்னேஸ்வரா மகாவித்தியாலயத்தில் நேற்றுமுன்தினம் புதன்கிழமை காலை இச்சம்பவம் இடம்பெற்றுள்ளது.
தண்டனை வழங்கிய ஆசிரியருக்கு உடனடியாக இடமாற்றம் வழங்கப்பட்டதாகவும் பாடசாலை வட்டாரத் தகவல்கள் தெரிவித்தன.
மேற்படி பாடசாலையில் தரம் 8 இல் கல்வி கற்கும் மாணவி ஒருவர் வீட்டுப் பாடம் செய்யாமல் வந்ததன் காரணமாக ஆசிரியரால் தண்டிக்கப்பட்டார்.
இதன்காரணமாக தொடர்ந்து அழுது கொண்டிருந்த மாணவி திடீரென மயங்கி வீழ்ந்தார் என்றும் பின்னர் அவர் அவசரமாக வைத்தியசாலையில் சேர்க்கப்பட்டார் என்றும் தெரிவிக்கப்படுகின்றது.
சம்பவம் குறித்து வலயக் கல்வித் திணைக்களத்திலும் முறைப்பாடு செய்யப்பட்டுள்ளது. இதனை அடுத்து ஆசிரியரை எதிர்வரும் திங்கட்கிழமை முதல் வேறு பாடசாலைக்கு இடமாற்ற நடவடிக்கை எடுக்கப்பட்டுள்ளதாகவும் தெரியவருகின்றது.
இதேவேளை,
யாழ். கொக்குவில் இந்துக் கல்லூரியில் அரசியல் விஞ்ஞான பிரிவில் கல்வி கற்கும் மாணவன் ஒருவரை ஆசிரியர் தாக்கி காயப்படுத்தியுள்ள சம்பவம் ஒன்று இடம்பெற்றுள்ளது.
தாக்குதலுக்குள்ளான ச. அனந்தீசன் என்ற மாணவன் வலி தாங்க முடியாமல் பாடசாலை முடிந்தவுடன் யாழ். போதனா வைத்தியசாலையில் சக மாணவர்களால் அனுமதிக்கப்பட்டார்.
வகுப்பில் பாடம் நடைபெறாத வேளை வகுப்பை விட்டு வெளியே பாடசாலை வளாகத்தினுள் சென்ற மாணவனை ஆசிரியர் எதுவித விசாரணையும் இன்றி மாணவனின் முகத்தில் தாக்கியுள்ளார். இதன்காரணமாக மாணவனின் முகத்தில் கண்டல் போன்ற கட்டி ஏற்பட்டுள்ளதாக வைத்தியசாலை வட்டாரங்கள் தெரிவிக்கின்றன.
யாழ்.குடாவில இவ்வாறு பல சம்பவங்கள் வெளியில் வராமல் இடம்பெறுவதாகத் தெரிவிக்கப் படுகின்றது.
இதுதொடர்பில் கல்வித் திணைக்களம் உரிய நடவடிக்கை எடுக்கவேண்டும் என பெற்றோர் தரப்பில் விசனம் தெரிவிக்கப்பட்டுள்ளது.